DSE Biochem Topscorer
🌟2017 DSE Bio 5** Chem 5**
🌟現正就讀牛津大學臨床神經科學博士
🌟DSE 生物補習界全行唯一：牛津大學臨床及治療神經科學碩士畢業 （Distinction）
🌟中大生物醫學一級榮譽
DSE Biochem Topscorer 的話
大家睇到我係 CU biomed 同 Oxford 讀，可能會覺得我係一個 Top student，但其實背後我都有唔少不為人知既經歷。
自從我懂事識講野起，我就唔知道點解特別鍾意同醫學有關既野，睇好多醫學書之餘，我仲好鍾意收集同醫學有關既單張同小冊子，甚至仲有收集藥盒既習慣。我屋企除左一個好耐唔見既親戚做鄉村醫生之外，我父母都同醫學毫無關係，而且無任何其他人 inspire 我，所以身邊既親戚同老師都覺得我係一個好聰明既小朋友😆一開始既時候，我對傳染病方面最有興趣，想做一個專攻傳染病既醫生。可惜天意弄人，小學同初中短短幾年，我經歷父親欠債、家庭暴力、住劏房、校園欺凌等逆境，顛沛流離，不斷轉校搬屋，住既地方可以有老鼠係天花板跌落黎。各種各樣既壓力令我開始有情緒病，最後被診斷為自閉症同躁鬱症（都係屬於 SEN 既範疇）。自此之後，我就改變左我既興趣方向，希望做一個精神科醫生，幫到更多同我一樣既病人。不過，我了解更多醫科既資料之後發現自己未必應付到 medic 既要求，所以我開始諗有無其他醫療行業方面既野適合我。當我偶然睇到 biomedical sciences 依科，發現自己除左醫生之外其實最想做既係學術研究，我希望做一個神經科學家專門研究精神疾病，而科學界對依方面既認識仍然係好不足，大腦仍然有好多未知既奧秘。當我睇到佢地所提供既研究機會之後，我就覺得依科應該可以令我達成自己既夢想，想做自己想做既事，所以我就最後一刻轉 choice 選擇 CU biomed。由細到大，我都係一個好八卦，好多問題，成日咩都想知既人，我相信依個求知慾亦都係做科學研究既其中一個要素。如今，我有幸去到 oxford 繼續追尋我 neuroscientist 既夢想，希望未來三四年讀完 phd 之後可以返香港慢慢爬上去，建立屬於自己既 research lab，達成我研究藥物同診斷方法幫助情緒病/SEN同路人既目標。
睇到依度，你可能都唔太明白咁同我教補習有咩關係。其實我以前初中都經歷頹廢同成績差既階段，雖然成績未到包尾但都只係中下游水平。直到中三要揀科既時候，我好似突然醒悟到我既人生目標，記得自己以前對醫學既興趣，終於下定決心去努力讀書，考好名次以揀到自己想揀既electives。以前我好唔鍾意補習，阿媽辛苦供我補幾科我都唔會留心聽書，但自從中三之後我就開始由討厭補習變成鍾意補習，開始學習點寫筆記同溫書，係一年之內重新成為全級頭 25% 既學生，揀到自己鍾意既 bio 同 chem。係依個過程入面，補習令我學習到知識以外既野 - 考試技巧。由於我食藥容易攰同埋要早訓既關係，我一日可以溫習既時間比一般人短，所以補習正正幫助我掌握到有咩考試必考既位置，集中精力溫果 d 部分，而且學習到答題框架同 MC skill 令我快速 KO 題目，節省唔少時間，以少勝多。另外，我通過補習亦學到 pastpaper 既重要性，甚至開始自己整理屬於自己既 by topic pastpaper，鑽研考試趨勢同題型。隨住我成績既進步，唔少同學開始慢慢問我有關 bio chem 既問題，甚至試過一次放學之後好似開班咁留低教人，果陣真係好大成功感同滿足感。慢慢地，我開始覺得自己有第二個使命 - 利用自己既知識幫助其他人，我好想幫助同學由下游爬到上游，教大家點樣打敗 DSE 依個大 boss。
諗返轉頭，如果當年無我啊媽迫我補習，令我接觸到補習改善成績，我根本唔會考到 Best 6 35 分入到中大，更談何 oxford？所以，我畢業後堅持做補習，希望透過 Bio/chem 依兩個選修科幫大家衝星入到自己想入既大學，追逐屬於自己既夢想，改變自己既命運。唔少人誤以為有 SEN 既學生係能力好差，但我就希望證明比大家睇，有 SEN 唔代表入唔到 U，反而我將 SEN 轉化為優勢，幫我 Bio 奪星。自閉症診斷標準入面有一項係狹隘興趣（Restricted Interest），而依種對興趣既堅持正正就推動到我不斷鑽研答題技巧同考評趨勢既動力，令我不斷改善筆記，力臻完美。有 d 自閉症人士可以記到好多巴士/鐵路路線，而我就可以記得某個 topic 係 DSE 邊年考過，考左咩方向。
我可以逆境求生，反敗為勝，你都可以！無論你底子如何，甚至有特殊既學習需要，我都希望透過教學令你谷底反彈，一齊陪你走過 DSE 既旅程前往摘星之路～