唔係賣花讚花香，Biomedical sciences 生物醫學近幾年黎越黎越受 dse 同學既歡迎，每年都有唔少人問我關於 biomed 既出路或者讀 d 咩，當中最多人問既一定係：Biomed 轉到 medic 既機會幾大？轉唔轉到？？為左更加準確咁回答大家依個問題，我特登問左係 hku biomed 既朋友仔同埋我係 cu biomed 轉左 medic 既同學，得到一 d 比較準確既數據。

首先， HKU 黎講，2016-2022共有 23 個人畢業之後讀 professional degree 包括 medic，大約係 <10% 左右既畢業生。HKU biomed 唔少人都係因為差一兩分或者面試 fail 左入唔到 medic，見到 hku biomed 有得 articulate 去 MBBS 先選擇，所以收生全港分數最高。至於 CU 方面，官方無公開有幾多人轉到 medic，但根據我同學提供既資料，cu biomed 一般可以有兩個途徑去 medic，第一個就係 internal transfer，另外一個就係讀完 4 年畢業再申請以 second degree 既形式入 medic。第一個途徑比較難，首先需要 cumulative GPA 3.7/4.0（當然申請得既唔少都分分鐘 3.8-3.9 甚至爆 4，3.7 只係最低要求），之後仲要係眾多成績優異既同學之中脫穎而出贏得面試官歡心，因為一年最多只收 5-6 個（有時候可以一個都唔收），所以競爭激烈。以我所知，cu biomed 有 3 個人由依個途徑轉到 medic。第二個途徑，都係需要同學成績優異，要有 first class honours (一級榮譽)，需要提醒大家既係 cu biomed 1st hon 競爭激烈，一班大約三四個人先有依張入場券。我自己識另外 4 個人以依個途徑入，近年大約每年 2 個同學左右由 cu biomed grad 到 mbchb。最後輪到 cityu bms (甚至最近新開既東華同都會 biomed），我手上就無數據，大家自己諗下啦 😂😂

總括而言，biomed 轉到醫科既機會唔係無，不過少過十分一，而且要求非常高，GPA 高 / 一級榮譽只係入場券，仲有好多其他科既同學 (e.g. Biochem, public health, pharm, nursing) 排緊隊同你爭，又要過面試一關，絕對唔係大家想像中話努力就得。咁大家可能會話：我日 chur 夜 chur，chur 到個爆 4 咪得囉？大家要明白，Biomed 好多人都想轉 medic，競爭激烈，而且讀既內容同醫科頭兩年 preclinical 既科目非常相似，要背既野比 DSE 大最少十倍，攞到高分絕非易事，千其唔好覺得 dse 考得好 biomed 就一樣可以靠努力讀得好，大家一定要有心理準備。

點解我要倒米叫大家諗清楚唔好諗住 biomed 轉 medic 咁容易呢？Biomed 同 medic 都有個 ‘med’ / ‘醫學’，但可以做到既野差天共地。淨係簡單一個 point：醫生除左可以行醫之外，亦可以係大學做research做教授，甚至可以去醫管局衛生署做管理層。相反，biomed 雖然讀既野同 medic 有 d 近似，但因為無任何專業資格而令我地畢業之後無辦法做任何既醫療專業人員（如果要做就要額外再讀），主要都係做 research 為主，彈性無 medic 咁大。講句現實 d 既，據我所知就算 hku biomed 畢業生人工平均都係 18k 左右，如果大家真係無興趣做研究，你會覺得好 frustrated，讀完 4 年會問點解自己攞 30 幾分出黎人工咁低，依個時候你先後悔已經太遲。部分人讀完 4 年發現自己唔鍾意做研究，又唔想做 biotech business，唯有再花兩三年時間讀多個物理治療/言語治療/護士等既 master 轉行，難免走多左冤枉路。大家試諗下，人生有幾多個十年？其實如果你入得 hku/cu biomed，你既分數已經可以揀 medic 以外大部分醫療科，如果你真係想係醫療行業發展，幫助病人，其實唔只醫科先可以做到。就算你唔係為幫人，你諗前途/人工，其他醫療科都係上上之選，無需要攞自己前途 All or none 咁賭一鋪。Biomed 轉唔到醫科，你就要局住做科研或者生物科技公司，要額外讀多幾年先可以轉去其他醫療科，到時花錢花時間（master 學費都要十幾二十萬）。

題外話，如果大家真係好想讀醫，但成績又差幾分，而你屋企又可以負擔的話，不如考慮去外國讀醫，大家睇過新聞都知香港花盡心機係外國「搶人才」返香港做醫生，依家外國 medic 畢業要回流都比以前容易，甚至聽講有人外國讀 Year1 Medic 之後non-jupas 入返香港 medic。如果大家負擔唔起去外國讀 medic，咁不如諗下你係咪真係非 medic 不可，定係其實你對其他醫療專業 (e.g. 物理治療、職業治療、醫療化驗）都有興趣呢？記住，唔係淨係醫生先幫到病人，其他醫療專業都一樣可以幫人，千其唔好咁執著。

最近睇到一個新聞，有人轉 medic 幾次面試都失敗，但堅持繼續報。雖然勇氣可嘉，但大家都要考慮如果自己最後真係轉唔到，咁係咪一世都唔做其他野呢？大家都應該留返條後路比自己。況且，讀住醫療科亦可以好似 biomed 咁申請 trans / second degree，但好處係就算你申請唔到都可以做醫護人員，進可攻退可守。

當然，我唔係完全反對大家讀 biomed 轉 medic，只係提供多 d 資料比大家做一個更加明智既決定，希望大家行少 d 冤枉路～

<頭盔：此 Post 純屬個人觀察及意見，並非代表任何人立場，如有錯誤之處敬請原諒>
<鳴謝：HKU 消息人士 + CU Biomed 同學>